டெல்லி: ஐபிஎல் 18வது சீசன் 48வது லீக் ஆட்டத்தில், டெல்லி கேப்பிடல்ஸ் அணியை எதிர்கொண்ட நடப்பு சாம்பியன் கொல்கத்தா நைட் ரைடர்ஸ் அணி ஆல்ரவுண்டர் சுனில் நரைன் அசத்தலில் 14 ரன் வித்தியாசத்தில் த்ரில் வெற்றி பெற்றது.
அருண் ஜெட்லி அரங்கில் நடந்த இப்போட்டியில், டாஸ் வென்ற டெல்லி கேப்பிடல்ஸ் முதலில் பந்துவீச… கேகேஆர் அணி 20 ஓவரில் 9 விக்கெட் இழப்புக்கு 204 ரன் குவித்தது. குர்பாஸ் 26 ரன் (12 பந்து, 5 பவுண்டரி, 1 சிக்சர்), சுனில் நரைன் 27 ரன் (16 பந்து, 2 பவுண்டரி, 2 சிக்சர்),கேப்டன் ரகானே 26 ரன் (14 பந்து, 4 பவுண்டரி, 1 சிக்சர்), ரகுவன்ஷி 44 ரன் (32 பந்து, 3 பவுண்டரி, 2 சிக்சர்), ரிங்கு சிங் 36 ரன் (25 பந்து, 3 பவுண்டரி, 1 சிக்சர்), ரஸ்ஸல் 17 ரன் (9 பந்து, 2 பவுண்டரி, 1 சிக்சர்) விளாசினர்.
கேப்பிடல்ஸ் பந்துவீச்சில் ஸ்டார்க் 3, விப்ராஜ் நிகம், அக்சர் படேல் தலா 2 விக்கெட், சமீரா 1 விக்கெட் வீழ்த்தினர். இதைத் தொடர்ந்து, 20 ஓவரில் 205 ரன் என்ற கடினமான இலக்கை துரத்திய டெல்லி கேப்பிடல்ஸ் 20 ஓவரில் 9 விக்கெட் இழப்புக்கு 190 ரன் மட்டுமே எடுத்து 14 ரன் வித்தியாசத்தில் தோல்வியைத் தழுவியது.
டு பிளெஸ்ஸி அதிகபட்சமாக 62 ரன் (45 பந்து, 7 பவுண்டரி, 2 சிக்சர்), கேப்டன் அக்சர் படேல் 43 ரன் (23 பந்து, 4 பவுண்டரி, 3 சிக்சர்), விப்ராஜ் நிகம் 38 ரன் (19 பந்து, 5 பவுண்டரி, 2 சிக்சர்) விளாச, மற்ற வீரர்கள் பெரிதாகக் கை கொடுக்கவில்லை. கடைசி ஓவரில் 25 ரன் தேவைப்பட்ட நிலையில், ரஸ்ஸல் வீசிய அந்த ஓவரில் 10 ரன் மட்டுமே கிடைத்ததுடன் 5வது பந்தில் நிகல் விக்கெட்டையும் டிசி பறிகொடுத்தது.
கேகேஆர் பந்துவீச்சில் சுனில் நரைன் 4 ஓவரில் 29 ரன்னுக்கு 3 விக்கெட் கைப்பற்றினார். வருண் சக்ரவர்த்தி 2, அனுகுல் ராய், வைபவ் அரோரா, ரஸ்ஸல் தலா 1 விக்கெட் வீழ்த்தினர். 27 ரன் விளாசியதுடன் டு பிளெஸ்ஸி, அக்சர், ஸ்டப்ஸ் என 3 முக்கிய விக்கெட், கே.எல்.ராகுலை ரன் அவுட் செய்தது, ஒரு கேட்ச் என ஆல்ரவுண்டராக அசத்திய சுனில் நரைன் ஆட்ட நாயகன் விருது பெற்றார்.
டெல்லியில் விளையாடிய 4 போட்டிகளில் கேப்பிடல்ஸ் 3வது தோல்வியைத் தழுவியுள்ளது.
