பிரப்சிம்ரன் ஆட்ட நாயகன் * பதோனி போராட்டம் வேஸ்ட்
தரம்சாலா: ஐபிஎல் 18வது சீசன் 54வது லீக் ஆட்டத்தில், பஞ்சாப் கிங்ஸ் அணி 37 ரன் வித்தியாசத்தில் லக்னோ சூப்பர் ஜெயண்ட்ஸ் அணியை வீழ்த்தியது.
இமாச்சல் கிரிக்கெட் சங்க ஸ்டேடியத்தில் நடந்த இப்போட்டியில், டாஸ் வென்ற எல்எஸ்ஜி முதலில் பந்துவீச… பஞ்சாப் கிங்ஸ் 20 ஓவரில் 5 விக்கெட் இழப்புக்கு 236 ரன் குவித்தது. தொடக்க வீரர் பிரப்சிம்ரன் சிங் அதிகபட்சமாக 91 ரன் (48 பந்து, 6 பவுண்டரி, 7 சிக்சர்) விளாசினார்.
ஜோஷ் இங்லிஸ் 30 ரன் (14 பந்து, 1 பவுண்டரி, 4 சிக்சர்), கேப்டன் ஷ்ரேயாஸ் 45 ரன் (25 பந்து, 4 பவுண்டரி, 2 சிக்சர்), நெஹல் வதேரா 16 ரன் (9 பந்து, 2 பவுண்டரி, 1 சிக்சர்) விளாசி பெவிலியன் திரும்பினர்.
ஷஷாங்க் சிங் 33 ரன் (15 பந்து, 4 பவுண்டரி, 1 சிக்சர்), ஸ்டாய்னிஸ் 15 ரன்னுடன் (5 பந்து, 1 பவுண்டரி, 1 சிக்சர்) ஆட்டமிழக்காமல் இருந்தனர். லக்னோ பந்துவீச்சில் ஆகாஷ் சிங், திக்வேஷ் ரதி தலா 2, பிரின்ஸ் யாதவ் 1 விக்கெட் வீழ்த்தினர்.
இதையடுத்து, 20 ஓவரில் 237 ரன் எடுத்தால் வெற்றி என்ற மிகக் கடினமான இலக்குடன் துரத்தலை தொடங்கிய லக்னோ சூப்பர் ஜெயண்ட்ஸ் 20 ஓவரில் 7 விக்கெட் இழப்புக்கு 199 ரன் மட்டுமே எடுத்து 37 ரன் வித்தியாசத்தில் தோல்வியைத் தழுவியது.
ஆயுஷ் பதோனி அதிகபட்சமாக 74 ரன் (40 பந்து, 5 பவுண்டரி, 5 சிக்சர்), அப்துல் சமத் 45 ரன் (24 பந்து, 2 பவுண்டரி, 4 சிக்சர்), கேப்டன் ரிஷப் பண்ட் 18, மார்க்ரம் 13, மில்லர் 11 ரன்னில் விக்கெட்டை பறிகொடுத்தனர். ஆவேஷ் கான் 19 ரன், பிரின்ஸ் யாதவ் 1 ரன்னுடன் ஆட்டமிழக்காமல் இருந்தனர்.
பஞ்சாப் பந்துவீச்சில் அர்ஷ்தீப் சிங் 4 ஓவரில் 16 ரன் மட்டுமே விட்டுக்கொடுத்து 3 விக்கெட் கைப்பற்றி அசத்தினார். அஸ்மதுல்லா 2, யான்சென், சாஹல் தலா 1 விக்கெட் வீழ்த்தினர். பிரப்சிம்ரன் சிங் ஆட்ட நாயகன் விருது பெற்றார். பஞ்சாப் கிங்ஸ் புள்ளிப் பட்டியலில் 2வது இடத்துக்கு முன்னேறிய நிலையில் (15 புள்ளி), லக்னோ (10 புள்ளி) 7வது இடத்தில் பின் தங்கியுள்ளது.
