மான்செஸ்டர்
டெஸ்ட் கிரிக்கெட் வரலாற்றில் அதிக ரன்கள் குவித்த பேட்ஸ்மேன்களில் பட்டியல் 2வது இடத்தை பிடித்து சாதனை படைத்தார் இங்கிலாந்து அணியின் ஜோ ரூட்.
இந்தியா, இங்கிலாந்து அணிகள் இடையிலான 4வது டெஸ்ட் கிரிக்கெட் போட்டி மான்செஸ்டர் நகரில் நடைபெற்று வருகிறது. இதன் டெஸ்ட் போட்டியில் இந்திய அணி முதல் இன்னிங்ஸில் 358 ரன்களுக்கு ஆட்டமிழந்தது. அதிகபட்சமாக சாய் சுதர்சன் 61, யஷஸ்வி ஜெய்ஸ்வால் 58, ரிஷப் பந்த் 54 ரன்கள் சேர்த்தனர். இங்கிலாந்து அணி சார்பில் பென் ஸ்டோக்ஸ் 5 விக்கெட்களை வீழ்த்தினார்
இதையடுத்து விளையாடிய இங்கிலாந்து அணி 2-வது நாள் ஆட்டத்தின் முடிவில் 46 ஓவர்களில் 2 விக்கெட்கள் இழப்புக்கு 225 ரன்கள் எடுத்தது. ஸாக் கிராவ்லி 84 ரன்களும், பென் டக்கெட் 94 ரன்களும் விளாசிய நிலையில் ஆட்டமிழந்தனர். ஆலி போப் 20, ஜோ ரூட் 11 ரன்களுடன் ஆட்டமிழக்காமல் இருந்தனர்.
நேற்று 3-வது நாள் ஆட்டத்தை இங்கிலாந்து அணி தொடர்ந்து விளையாடியது. ஆலி போப் 128 பந்துகளில், 7 பவுண்டரிகளுடன் 71 ரன்கள் எடுத்த நிலையில் வாஷிங்டன் சுந்தர் பந்தில், சிலிப் திசையில் நின்ற கே.எல்.ராகுலிடம் பிடிகொடுத்து வெளியேறினார். இதையடுத்து களமிறங்கிய ஹாரி புரூக் 3 ரன்களில் வாஷிங்டன் சுந்தர் பந்தில் ஸ்டெம்பிங்க் ஆனார்.
இதன் பின்னர் ஜோ ரூட்டுடன் இணைந்த பென் ஸ்டோக்ஸ் பார்ட்னர்ஷிப்பை கட்டமைத்தார். இதனால் இங்கிலாந்து அணி 87-வது ஓவரில் 358 ரன்களை கடந்து முன்னிலை பெறத் தொடங்கியது. நிதானமாக விளையாடிய ஜோ ரூட் 178 பந்துகளில், 12 பவுண்டரிகளுடன் தனது 38-வது சதத்தை விளாசினார். இதன் மூலம் டெஸ்ட் கிரிக்கெட் வரலாற்றில் அதிக சதங்கள் விளாசியவர்களின் பட்டியலில் 4-வது இடத்தில் உள்ள இலங்கையின் குமார் சங்கக்கராவின் சாதனையை சமன் செய்தார் ஜோ ரூட்.
மேலும் இந்தியாவுக்கு எதிராக அவர், அடித்த 12-வது சதம் இதுவாகும். இதன் வாயிலாக இந்தியாவுக்கு எதிராக அதிக சதங்கள் விளாசியிருந்த ஆஸ்திரேலியாவின் ஸ்டீவ் ஸ்மித்தின் (11 சதங்கள்) சாதனையை முறியடித்தார். அபாரமாக விளையாடிய ஜோ ரூட் 248 பந்துகளில், 14 பவுண்டரிகளுடன் 150 ரன்கள் சேர்த்த நிலையில் ஜடேஜா பந்தில் ஸ்டெம்பிங்க் ஆனார்.
இதைத் தொடர்ந்து களமிறங்கிய ஜேமி ஸ்மித் 9, கிறிஸ்வோக்ஸ் 4 ரன்களில் ஆட்டமிழந்தனர். 3வது நாள் ஆட்டத்தின் முடிவில் இங்கிலாந்து அணி 135 ஓவர்களில் 7 விக்கெட்கள் இழப்புக்கு 544 ரன்கள் குவித்தது. பென் ஸ்டோக்ஸ் 77 ரன்களுடன் ஆட்டமிழக்காமல் இருந்தார். கைவசம் 3 விக்கெட்கள் இருக்க 186 ரன்கள் முன்னிலை பெற்றுள்ள இங்கிலாந்து அணி இன்று 4வது நாள் ஆட்டத்தை விளையாடுகிறது.
3வது நாள் ஆட்டத்தின் போது ஜோ ரூட் 120 ரன்களை எட்டிய போது டெஸ்ட் கிரிக்கெட்டில் அதிக ரன்கள் குவித்து 2-வது இடத்தில் இருந்த ரிக்கி பாண்டிங்கின் (13,378) சாதனையை முறிடியத்தார். ஜோ ரூட் 13,409 ரன்கள் சேர்த்துள்ளார். இந்த வகையில் சச்சின் டெண்டுல்கர் 15,921 ரன்களுடன் முதலிடத்தில் உள்ளார்.
